舊 So 9 嗡
7 up、9 up、心up up，都是會講
(The So's-Files Version 4.0)
journal
profile
tagboard
recommend
7 up、9 up、心up up，都是會講
(The So's-Files Version 4.0)
星期一, 8月 28, 2006
夢 /12:16 下午
月亮出黎！你今日發左夢未呀！？
夢，呢味野我都相信我日日都會發。好多時都會唔記得之前一晚發過乜夢 ，但第二日做某d野既時候，好奇怪的又會勾起返！但你想諗返多d咩！？基本上又唔會諗得到！
我同我老婆同居左都兩個幾月了，佢成日都話會發惡夢，但我發惡夢就真係好少好少，我d夢，唔係咸野，就係搞笑，最正經都係實理下理實中一d想做的野。記得我細個就已經咸夢，我都唔記得係幾歲！不過肯定係讀緊小學三年班以下！因為個夢只係好多女人唔著衫褲，冇做咩性愛場面，但我三年班只前根本唔識呢科，所以冇著衫褲已經好咸！而呢個咸夢，到家下都仲好深刻！
而笑既夢，我基本上晚晚都發！發笑夢如果現實中勾到的，的確畀到好多靈感我去搞屎棍！因為呢類笑夢，大多都係唔會邏輯的！例如我踢完個波，省中左人地個頭，人地個頭又變左個足球；但本身個足球有屎，所以佢個頭都有，仲要係永久性的(夢入面係咁覺得嘛！)！佢唔忿氣自己個頭變左足球，唔忿氣果個係一個有屎既足球！！所以佢搵個頭週圍去「揩」人！係！我就係呢d咁老土玩屎尿屁的人！呢個屎夢足以令我笑醒！
其實真係好多好深刻的笑夢！唔記得係上年定前年，有日發到2米02的捷克國腳真高拿(Jon Koller)黎左新和里，佢同肥波一隊，對我地係龍足球隊的人！我一個mark死左佢，不停咁頂贏佢！不停咁頂、頂、頂、頂！結果頂到佢喊，係真係喊左出黎！我又笑醒左！
你會話我，你條蘇剿，有冇咁多gag呀頂！我發覺近幾年，我有控制個夢既能力！一個夢發d乜、有乜角色，我都唔可以控制，但發落左就真係可以控制到個劇情！例如我發過對面幢樓有人跳樓，原本係幾驚的！但佢三十幾層咁跳落去，落到去佢竟然彈起身講：「Yeah!我快過你！」之後走左去！都係我心入面諗左呢個場面，而之後發生左！
當然惡夢唔會冇既！好多時會畀車撞，然後個人就會用腳一踢，踢到自己醒左！而除左呢個之外，惡夢真係好驚好深刻的，有三個：第一係一年班果陣，上堂教左個「捕」字，之後發夢搭lift，個顯示幾樓的板，全部都係寫住個「捕」字！小一的我嚇到醒左！第二個係前幾年發既，我響夢入面係貨櫃車司機，我響夢入面訓醒然後落車，架車竟然棟左響度！我仲同自己講：「無事架，發夢架姐！」但對於一個貨櫃車司機黎講，貨櫃車就係佢的命根，所以夢入面的我跪左響度喊！最後就有關d神怪野了，如果有關神怪野而又唔係搞笑，仲會驚的，我就係得呢個！我入到間廟入面，竟然全部香都倒轉插！你話驚唔驚！！我就好驚，又嚇到醒左！
好多人話夢有得解，我覺得如果下下都要解就好煩！訓著啦都，一日最relax既時間都要理咁多，好辛苦姐！笑下咪好囉！
about me
all about you here.